BODOH BAGA' LEPUS

BODOH BAGA' LEPUS

Karya Ustadz Muttaqin Anang Toha

Bodoh baga' lepus,

Awak sekandungan bemusohan tak saling meleokan.

 

Bodoh baga' lepus,

Umak bapak dijahat-jahatkan,

 

Bodoh baga' lepus,

Nasehat baek tak diomehkan bahkan diartikan ngancam.

 

Bodoh baga' lepus,

Lah tau dilarang, maseh nak digawekan,

 

Bodoh baga' lepus,

Lah tau wajeb, malahan ditinggalkan dak takut kemarahan.

 

Bodoh baga' lepus,

Sudah tau salah, eee dibela-bela dan dibenar-benarkan.

 

Bodoh baga' lepus,

Sudah jelas benar nian, maseh bae disalah-salahkan.

 

Bodoh baga' lepus,

Kareno duit dan kepentingan, kebenaran dikorbankan,

 

Bodoh baga' lepus,

Ole mintak dialam urang, hargo diri digadaikan,

 

Bodoh baga' lepus,

Yang jujor dicurigai, yang buayo dipecayoi,

 

 

Bodoh baga' lepus,

Yang tulus disakiti, yang pengiuk dipuji-puji.

 

Bodoh baga' lepus,

Dunio dinomor satukan, akherat ndo benar nak disiapkan

 

Hhhhhhhh….

Ikolah pecaknyo, kalu nafsu tebiar nguasoi diri

Ikolah pecaknyo, kalu akal dak lagi befungsi,

Ikolah pecaknyo, kalu kebenaran ndo benar dihargoi.

Ceto nyadi,

Bodoh baga' lepus,

Buyan di atas buyan,

Buntang anyut dimakan ikan.

 

Payo urang,

galak-galak ngaco diri,

Kenangkan umor nambah teros tiap ari,

Cobo hkali-kali kalu ado yang ngajak cawisan dimilui,

Goh.. pacak saling nasehat-menasehati.

 

Awas Gok, yo!

Jangan nian hlalu meraso paleng sempurno,

Sebab buyan itun bukan cuman tak beilmu semato.

Tau yang benar, tapi sungkan ngamalkannyo,

Gileran yang salah ladas nian ngawekennyo,

Itu jugo namonyo buyan.

Bodoh baga' lepus.

 

Bodoh baga’ jugo bukan kareno tak mampu berpiker,

Bukan pulo kareno tak pandai beucap,

Tetapi, ketiko kebenaran sudah tesingkap,

Maseh bae milih jalan yang sesat.

Itu namonyo, Gok yo, bodoh baga’ lepus jugek. Tau dak?

Oooiiii….

Rugi nian urang yang cak itu,

Ukuran idupnyo tegantung kepentingan dan hawa nafsu.

Kapan bedebat, pecak dio tula yang pintar dan hebat,

Padohal tak sadar dioktu, sebenarnyo lagi mengumbar cacat.

 

Astaghfirullohal 'azim

Mintaklah nian kito selamat